På ei flett ny kunstgrasbane, som faktisk var ganske flott, tok Osterøy imot Austrheim/Lindås til dyst. Og dyst skulle det bli, for kampen kunne svært lett ha vippa begge vegar.

Det var bortelaget som kom best i gang i solskinet på Osterøy, og for første gong i år var det samarbeidslaget Austrheim/Lindås som gjekk i føringa. Marius Fredriksen slo eit kort hjørnespark til Jonas Buene. Buene trilla ballen tilbake til Fredriksen, som omtrent frå 16-meterstreken ekspederte ballen vidare i nettmaskene bak heimelaget sin keeper. Bortelaget styrte kampen ei lita stund etter dette også, men etter kvart tok Osterøy meir og meir over kampen, og skulle også få utlikninga like før pause, då eit skudd endra retning i Sindre Hodne Manger, og gjekk i mål bak ein sjanselaus Fanebust.

Også andre omgang var av den svært jamne sorten, og begge lag såg sjansen til å ta tre poeng. Begge lag kjempa seg til sine sjansar, og banespelet var jamnt. Det skulle berre kome eit mål til, og uheldigvis var det heimelaget som sto for dette, med eit vakkert skudd frå like utanfor 16-meteren, og slik ebba kampen ut. Kampens einaste kort vart gitt til heimelagets Markus Fossdal, etter gjentatte etterslengar. Godt sett av dommaren, som gjorde ein meget bra kamp, og hadde kontroll frå start til slutt. Eit ekstra stort pluss til dommar Myrvold, som sannsynligvis gjorde den beste dommarjobben vi kjem til å få sjå i år.

Nok eit 1-2 tap for Austrheim/Lindås, men kampen gav oss all mogleg grunn til å reise heimatt med heva hovud, då kampen klart viste at juniorane er på rett veg.